دوبیتی های هزارگی

چند دوبیتی هزارگی

******************

دیدِه مه وختی ایسترچی مونی تو

تارای دل مَـــــره سورچی مونی تو

مزه کَـدِه تونـان عاشـــــــــــوقی ره

اگه سِیرغونخری سولچی مونی تو

******************

شیرینی لب توره خُرما نداره

گپ وگوفتارتوره مَـــــینا نداره

بیا کی بیگردیم بازو ده بازو

ازمُلا پورســــیدوم گونا نداره

 ********************

آشوقبـــــــازی کارِآسونییَسته

کارِهــر باچــه ی نادو نییَسته

روزی آخیرباچه دوتا موکـــونه

باچـــــه قَـــدَرِ دوخترو نییِسته

*****************

دیل مه موشَه بِیوم دیغون تو شونوم

روزِ ده گَشت بِِیوم قوربون تو شونوم

خِیرامو کده لبِ جوی میگـــــــــردی

بلَیبورشیشت وگشتون تو شونوم

*******************

شامِ بیگا چیراغه داغ کنوم ما

کمرباریگ روی تورَماخ کنوم ما

خــــــودا مَرَدِیَــه ما دیوزده ره

قارِیِنـــــگه رَسَرتوتوق کنوم ما

********************

مه قوربانت شوم ای یار ســـــــرخ پوش

سونی چیشمه موری روزی شومه خوش

الهی مادرِپیرت بمــــــــــــــــــــــــیرد

ده دیستی نازُکَــــــــکِت داده چَی جوش

***********************

ده باری دوبیتی های هزارگی

اگه مو بیخوایی کِی از آسان ترین طریقۀ پُور کَدونی تنایی های آدَمِی گپ دِیی شاید از دوبیتی یاد کنی ، یعنی کِی دوبیتی خیلی آسو میتنه تنایی های انسان ره پور کنه. ده بین مردومِ آزره دوبیتی گوفتو رواج استه کِی اِی دو بیتی ها قنجیغی امو مردم عام ،کِی    شاید ایچ رقم سواد ند رِن گوفته موشه.

 دلیل گوفتونِ ازی دوبیتی ها صِرف عشق،شور،شوق،سوزوگدازاسته کِی دوبیتی گویا ره مجبورمونه کِی دردِ دل ووختای غم وشادی خوره قد ازی دوبیتی ها بیان کنه.

 مو باید ازیگ قصّۀخطرناک یادآورشونی کِی او قصّه ، قصّۀ

                  ممنوعیّت وپرهیز دَدونِ مردم ازپدیده های ذوقی

 اونااسته.ده قَدِیما، مردم ازمو کِی ده جامعۀ مذهبی بودن ازدوبیتی گوفتو پرهیز دیده موشود. اونا دوبیتی نه گفته می تَنِیست و نه شنیده ،مگم عشق وعلاقه، کِی ده دیل مردوم بود، اِی پرهیز ره مَیده کده ودوبیتی اَم گوفتن و اَم شنیدن.

دوبیتی ها زیاد ترقنجیغی دمبوره خوانده موشه ، اِی آواز دمبوره و دمبوره چِی کیفیّت ومزۀ دوبیتی ره چند برابر مونه.

شاید تا هنوزکِی موفکرمونی کِی از تاریکی وبی سوادی نجات یافتی، ده اِی باوری کِی دوبیتی گوفتوودمبوره زدو گونا استه ،مگم اِی گپ غلط استه ازخاطریکی ایچ دلیل ندره کی ثبوت کنه کِی اِی گونا یه.مومینگرنِی کِی ده مولگی آزره وده هرجای دنیا کی مردوم

 آزره استه دمبوره رَه ازجان و دل خوش دره و ازغزلهای دمبوره لذّت موبرن وده هرجای ده هر خانه نوارهاو کیسیت های دمبوره موجود استه.

نظر ددو ره پورموشت نکید.